Pengawa Ngaga Sabun Ngena Minyak Masak Ke Udah Dikena ( Environmental Protection Initiative)

Bekelala enggau cikgu kami - Madam Hung ari My Centre Sibu. Peranak menua Taiwan tang udah nyadi kaban kitai tudah cikgu tu.Kati enda, udah diempu siko lutor specialist ba Rejang Medical Centre. Cukup landik ngajar kami sebuat.

Akaiii...chelum pala indah enda baka semut nutu gula ko kitai.Nya iya bala udah kelalu rindu ke pengawa begaga ke sabun tu.Bos Mr.henry Jalin pan enda keretik nengkila ke cikgu Hung nunyau perengka ngaga sabun tu.

Hermm...mayuh meh versi sabun gaga kami tu ila pemacha, bala amoi bendar meh.

Nyaaa..tu ko aku. terubah iya meda-meda aja meh sida ke lelaki.Udahnya nyau bela ka nyudu, bela ka nunyau, bela ka ngaga sabun ungkup diri sida iya. Chukup 'stidi'.

Jimat nuangka sabun ibu..naya legi enda alah bendar betuchika mija

Ari kiba : Cr. Rhoda Ting, Blogger(hihihi) , menyadi dalam kristus Kak Elita Wilson Mergie, Rity Anak Jawa, Masni Lugun enggau girl misi (Ibu Micy).

Bendar amoi ngambi gambar

steady cikgu.Nasit enda kena rembang bala anembiak redak ke apas penemu ney.

"Tunyau manah-manah, udahnya simpanka kulit sunkist tu..gula & garam sesudu teh..."

"Peda kita pengelikat iya..udah chukup tunyau tu, uji angkatka penunyau(whisker), enti nadai betali neritik reti iya udah chukup au. Nyadi kita nyediaka kereban/chuan kena meku ke sabun tu legi"

 

"Haa...lubah-lubah..begadai-gadai..."

Tu meh asil sabun ke digaga kami sebuat. Nganti 4 minggu sepengudah ngaga baru tau dikena.

Ditu ku ka bekunsi resipi sabun nyema bisi bala pemacha bisi minat ka ngaga:


500 gram minyak masak ke udah dikena (laban ngelalau kita ngaga kitar semula )
70 gram caustic soda ( beli ari farmasi ko cikgu)
168 ais 


Perengka:

1. Penimbang elektronik ( senang dibaca)
2. Sarung  jari / tutup idung(baka kena maya musim jerebu)
3. Kontena, penunyau & sudu stanless steel
4. Janging(cup), rod stainless steel
5. Caustic soda 
6. Minyak masak ke udah dikena & pemantis
7. Ais (ai/kiub)
8. Perengka tambah(pemilih kitai empu enti ka bisi penambah tu)
   Chunto ti ulih dikena : tepung gandum/buah kentang rebus ke udah
   dianchurka)/kupi injin/kulit oren parut/gula/garam...
9. Pewangi(essential oil)
10.Chuan (ulih ngaga mayuh macham chuan tang kereban nya mesti 
    plastik/styrofoam/kotak kertas susu (tetrapack) iya ke nadai pelapis baka 
   aluminium di dalam iya.


Tusun Chara Ngaga Sabun:

1. Keterubah, sukat minyak masak ke udah ditapis, ai ais/kiub ais enggau 
   'caustic soda'.

2. Mupuk nyimpan/ngulai 'caustic soda' mimit-mimit enggau bejimat ke dalam 
   ai ais/kiub ais sampai lela.Girau-girau datai ke chiru.

3. Campur minyak nya tadi ngagai campuran caustic soda + ai ais.

4. Girau kira-kira 10 minit dataika campuran enda entu bepanggai ba pengirau 
   nya tadi sereta neda betali-tali maya di kauk ngena pengirau iya.

5. Tuang jimat-jimat ke dala chuan ke udah dipilih lalu anti akira-kira 24 jam. 
   Udah 24 jam, tuang sabun begadai-gadai ari chuan iya lalu tetak (enti ka) 
   sabun nuan tadi.

6. Simpan/taruh sabun nuan ba endur ke rangkai sereta enda kelalu angat(x 
   begunaka peti ais iya kaban, asal anang endur ke angat).Nati kira-kira 4 
   minggu baru sabun tau dikena.


***Pesan blogger nuju sapa-sapa ke bisi minat  lalu ka nemu silik agi:

     Penerang ke silik tau betanya nuju cikgu tu (Madam Hung ari My 
     Centre Sibu) WeChat ID : Cellist_h  (Jaku English/ enti bisi penemu 
     jaku mandarin nya ke manah agi wai)


--Aram sama nguji ngaga wai kaban....tukar sampah ari dapur nyadi perengka ti beguna nengah jalai ti ulih ngintu rampa menua.